ಕವಿತಾ  

ಸನ್ನು ಮೊನಿಸ್, ಬೊಳಿಯೆ

ದುಃಖಾ ಥೆಂಬೊ.. 

ಹಾಂವ್ ಕಶಿಂ ಉದೆಲಿಂ...??

ಆಜ್ ತಾಣೆ ಮ್ಹಾಕಾ ರಚ್ಲೆಂ
ಅನಿ ತಾಣೆಂಚ್ ಕಿತ್ಯಾಕ್ ಸಾಂಡ್ಲೆಂ?
ಕಿತ್ಯಾಕ್ ಮೆಕ್ಳೆಂ ಕೆಲೆಂ, ಆಸ್ಡೆ ಥಾವ್ನ್ ಧರ‍್ತೆರ್?

ಹಾಂವ್ ಥಂಯ್ಚ್ ಆಸ್ಲ್ಯಾರ್ ಸೊಭ್ತಿಂ..
ಎಕ್ ಆಂಜಾ ಪರಿಂ ಸಂಸಾರ್ ಪಳೈತಿಂ..
ತಾಕಾ, ತಾಣಿಂ_ಹಾಣಿಂ ನಾಡ್ಲೆಂ, ಮ್ಹಾಕಾ ಭಾಯ್ರ್ ಲೊಟ್ಲೆಂ!

ಬೊಟಾ ತಕ್ಲೆರ್ ಮೊತಿಯಾ ಪರಿಂ ವಿಂಚುನ್..
ಕಯ್ರಾ ಪರಿಂ ಬಾಯ್ರ್ ಉಡಯ್ಲೆಂ..!
ಆಜ್ ಮ್ಹಾಕಾ ವಿಂಗಡ್ ಕೆಲೆಂ, ವರೆ-ವಿಂಗಡ್.. ಕಯ್ರಾ ಪಂಗಡ್..!

ಹೆಂ ದುಃಖ್ ಮ್ಹಜೆಂ-ತಾಚೆಂ, ಸುಖ್ ತಾಂಚೆಂ, ತಾಕಾ ರಡಯ್‍ಲ್ಲ್ಯಾಂಚೆಂ?
ಮಾಗೊಂ ಕಶೆಂ ತಾಂಚೆರ್ ಶಿರಾಪ್? ಪರಾತ್ ಎಕ್ ಉಟಾತ್ ರುದಾನ್..!
ಆನಿ ಉದೆತ್ ದುಃಖ್..! ಮ್ಹಜ್ಯೆ ಪರಿಂ ಧರ‍್ತಿ ಭಿಜಯ್ತ್.. ದುಃಖಾ ಥೆಂಬೊ ಜಾವ್ನ್..