ಆದಾ೦ವ್ಚೆ೦ ಪಾತಾಕ್

ಸನ್ನು ಮೊನಿಸ್, ಬೊಳಿಯೆ

ದೊಳೆ ಹಾ೦ವೆ ಧಾ೦ಪ್ಲ್ಯಾತ್
ತುಜೆ ಉಗ್ತೆ ದವರ್...
ಸೆಜಾರಾ ಮಾರ್ ಗುಳ್ಯಾ೦ಚೊ ಫ಼ಾರ್
ರಗ್ತಾ ವ್ಹಾಳ್ ಆ೦ಗ್ಣಾ ರಸ್ತ್ಯಾರ್...
ಚಡೊನ್ ಖುನಿ ಅ೦ತಸ್ಕರ್ನಾ೦ ಮೊನಿ೦
ಸೊಡ್ತಾ೦ ಹಾ೦ವ್ ಸುಸ್ಕಾರ್...
ಸ೦ಸಾರಾಚೆ೦ ಸರ್ವ್ ಮಾಗ್ತಾ೦ ಖರ್ಗ್
ದೆಖ್ಚೊನಾ೦ ಕೆದಿ೦ಚ್ ಸರ್ಗಾರ್...
ಆದಾ೦ವ್ ಬಾಪ್ ಕರಿನಾ ಪಾತಾಕ್
ಆಸ್ಲೆ೦ ಕಿತೆ೦ ಭುಮಿರ್...

 

ಉಭಾರ್ ಹರ್ಧೆ೦ ದಾಟ್ ಜಾ೦ಗೊ
ಮತಿರ್ ತೆ೦ತೆಸಾ೦ವ್ ಹಜ಼ಾರ್...
ಪಿ೦ಜ್ಕರ್ ವಸ್ತುರ್ ಮಾನ್ ಮಸ್ತು೦ಕ್
ಕೆದ್ನಾ೦ ಜಾಯ್ತ್ ಕಾಬಾರ್...
ಆವಯ್ ಎಕ್ಲಿ ಬಾಪಯ್ ಹಜಾರ್
ನಾ೦ವ್ ಕಿತೆ೦ ಲೊರಾರ್...
ಅನಾಥ್ ನೈ೦ ಪಾತ್ಕಾ ಖಾತಿರ್
ವ್ಯಭಿಚಾರಿ೦ಚೊ ಫುಡಾರ್...
ಆದಾ೦ವ್ ಬಾಪ್ ಕರಿನಾ ಪಾತಾಕ್
ಆಸ್ಲೆ೦ ಕಿತೆ೦ ಭುಮಿರ್...

 

ದೇಶ್ ದುಸ್ಮಾನ್, ರಾಜ್-ರಾಜಾಕ್
ಮನ್ಶಾ ಮಧೆ೦ ಪಾಗೊರ್...
ರಗ್ತಾ-ರ೦ಗ್, ನಾಸ್ತಾ೦ ವ್ಯತ್ಯಾಸ್
ರಿಗ್ಲೊ ಕಸೊ ಸೊಜೆರ್...
ನಾಸ್ತಾ೦ ಮೋಗ್ ಮನ್ಶ್ಯಾ ಸ೦ಬ೦ಧ್
ಜೀವ್ ಘೆತನಾ ಗಡಿರ್...
ಕಸ್ಲೊ ವಿಳಾಪ್ ಕುಟ್ಮಾ೦ ಮಧೆ೦
ಸೊಜೆರ್ ಜಾತಾನಾ ಅಮರ್...
ಆದಾ೦ವ್ ಬಾಪ್ ಕರಿನಾ ಪಾತಾಕ್
ಆಸ್ಲೆ೦ ಕಿತೆ೦ ಭುಮಿರ್...

 

ಅರ್ಧಿ-ಕುರಿ೦ ಪಾತ್ಕಾ೦ ಭೊಗೊಸ್
ಥೊಡಿ೦ ಬಾಕಿ, ಜಾತಾನಾ ಕುಮ್ಸಾರ್...
ಸಾ೦ಗ್ಚೆ೦ ಕಶೆ೦ ಕಳಾತ್ ಸಗ್ಳ್ಯಾ೦ಕ್
ಕಾಯ್ದೊ ವಿಸ್ರಾತ್ ವಿಗಾರ್...
ಪಾತ್ಕಾ೦ ಪುಣಿ೦ ನಾತ್ಲಿ೦ ತರ್
ಮನ್ಶಾ ಮಧೆ೦ ನಾತ್ಲೊ ಮೊಸೊರ್...
ದೆವಾ.., ಜರ್ ತು೦ವೆ ರಚ್ಲೊ
ಎವೆ ವಿಣೆ೦ ಸ೦ಸಾರ್...
ಆದಾ೦ವ್ ಬಾಪ್ ಕರಿನಾ ಪಾತಾಕ್
ಆಸ್ಲೆ೦ ಕಿತೆ೦ ಭುಮಿರ್...