ವಿಮಾನ್...!!

 

ಹಾಂವ್ ನೆಣಾಂ ಹೆಂ ಆಶೆಂ ಕಿತ್ಯಾಕ್ ಘಡ್ಲೆಂ!! ಆನಿ ಕೊಣೆಂಯ್ ಚಿಂತುಂಕ್ ನಾಂ, ಅಪ್ಲೆಂ ಮರಣ್! ಜಿವಿತಾಂತ್ಲಿ ಎಕ್ ಸಕಾಳ್, ಮಾಂಯ್ ಗಾಂವಾಂತ್ ಮೊಗಾಚ್ಯಾ ಕುಟ್ಮಾಕ್ ದೆಕ್ಚೆಂ ಸ್ವಪಾಣ್ ಪಳಯ್ತೆಲ್ಯಾಂಕ್ ಘೆವ್ನ್ ಏರ್ ಇಂಡಿಯಾ ದುಬಾಯ್ ಥಾವ್ನ್ ಉಬ್ಲೆಂ.  ಅನಿ ಆಬ್ಳೆ!! ಥಂಯ್ ಆಪ್ಲ್ಯಾ ಮೊಗಾಚ್ಯಾ ಮನ್ಶಾಚ್ಯಾ ಯೆಣ್ಯಾಕ್ ರಾಕ್ಚ್ಯಾ ತ್ಯಾ ದೊಳ್ಯಾಂಕ್ ಕಿಟಾಳ್ ಉಡ್ಲೆಂ!  ಸ್ವಪ್ಣೆಲಿ... ಅಪ್ಲ್ಯಾ ಸ್ವಪ್ಣಾಂತ್ ನಿರಾಸ್ ಜಾಲೊ!  ಜಾತಿ ಕಾತಿಚೊ ಭೇದ್ ನಾಸ್ತಾಂ ಹುಲ್ಪೊನ್ ಮೆಲೊ!

ಹೆಂ ಎಕ್ ಘಡಿತ್ ಹ್ಯಾ ಕವಿತೆಂತ್ ಮಾನೆಸ್ತಿಣ್ ಬೆನೆತ್ ನವಿತಾ ಮೊರಾಸಾನ್, ಬೊವ್ ಆಪುರ್ಬಾಯೆಚ್ಯಾ ಬೊಗ್ಣಾಂನಿ ಪಿಂತ್ರಾಯ್ಲಾಂ!  ತಿಕಾ ಬೆಳ್ಳೆ ವಿಜನಾಕ್ ಮ್ಹಾನಾಚೊ ಯೆವ್ಕಾರ್ ಮಾಗ್ತಾಂ.  ಅಪ್ಲ್ಯಾ ಪತಿ ಅನಿ ಸೊಭಿತ್ ಏಕಾ ಚೆರ್ಕ್ಯಾ ಸಾಂಗಾತಾ ಕುವೆಯ್ಟಾಂತ್ ತಿಚೊ ವಸ್ತಿ ಅನಿಂ ವಾವ್ರ್.  ಕೊಂಕ್ಣಿ ಕವಿತೆ ಸಂಸಾರಾಕ್ ತಿಚೆಂ ಯೆಣೆಂ ಹೆಂಚ್ಚ್ ಸುರ್ವಿಲೆಂ.  ಫ಼ೆಸ್ ಬುಕಾರ್ ಕಾಂಯ್ ಥೊಡೆಂ ಕೊಂಕ್ಣಿ ಬರಯ್ತಾ..!  ತಿಕಾ ಅಭಿಮಾನಾಚೊ ಸ್ವಾಗತ್ ದಿತಾನಾ ವಾಚ್ಪ್ಯಾನಿಂ ಆಭಿಪ್ರಾಯ್ ದಿಂವ್ಕ್ ದಾಕ್ಶೆಂವ್ಚೆಂ ನಾಕಾ ಮ್ಹಳ್ಳೊಯ್ ಉಲೊ ದಿತಾಂ.

ಸಂಪಾದಾಕ್: ಸನ್ನು ಮೊನಿಸ್, ಬೊಳಿಯೆ.

------------------------------------

ವಿಮಾನ್...!!

- ಬೆನೆಟ್ ಸವಿತ ಮೊರಾಸ್, ಕುವೇಯ್ಟ್

 

ಏರ್ ಇಂಡಿಯಾ ಎಕ್ಸ್‍ಪ್ರೆಸ್
ಜಾಲೆಂ ಸಭಾರಾಂಕ್ ನಿರಾಸ್
ಥೊಡ್ಯಾಂಕ್ ತೆಂ ಆಂತಿಮ್ ಪಯ್ಣ್
ಅನಿ ಕೊಣಾಕ್ ಪುನರ್ ಜೀವನ್!!

 

ಮಂಗ್ಳುರ‍್ಚೆಂ ಹೆಂ ಘಡಿತ್
ವಿಸ್ರೊಂಕ್ ಕೊಣಾಯ್ಕಿ ಜಾಯ್ನಾ ಹೆಂ ಖಂಡಿತ್
ಸರ್ವ್ ಜಾತಿಂಚೊ ಲೋಕ್ ತಾಂತುನ್ ಆಸ್‍ಲ್ಲೊ
ಮೊರ‍್ನಾಂತ್ ಕಾಂಯ್ ಬೇದ್‍ಭಾವ್ ನಾತ್‍ಲ್ಲೊ!

 

ಅಪ್ಲ್ಯಾ ಮಾಂಯ್ ಗಾಂವಾಕ್ ವೆಚೊ ಸಂತೊಸ್
ಅಪ್ಲ್ಯಾ ಕುಟ್ಮಾ-ಸಯ್ರ್ಯಾಂ ಧಯ್ರ್ಯಾಂಕ್ ಮೆಳ್ಚೊ ಉಲ್ಲಾಸ್
ವಿಮಾನ್ ಮಾಂಯ್ ಗಾಂವಾಂತ್ ದೆಂವ್ತಾನಾ
ಘಡ್ಲೆಂ ಕಿತೆಂ ಕಳ್ಳೆಂನಾ ಲೊಕಾಕ್ ಆವಾಜ್ ಎಕ್ ಆಯ್ಕಾತಾನಾ!!

 

ಲೋಕ್ ಕಠೀಣ್ ಉಜ್ಯಾ ಜಿಬೆಕ್ ಬಲಿ ಜಾಲೊ
ಮಿನುಟಾನಿಂ ಕಿತೆಂ ಘಡ್ಲೆಂ ತೆಂ ನೆಣಾಂ ಜಾಲೊ
ಸಯ್ರಿಂ ಧಯ್ರಿಂ, ಕುಟ್ಮಾಚಿಂ ಸಗ್ಳಿಂ ಕಂಗಾಲ್ ಜಾಲಿಂ
ಸಗ್ಳ್ಯಾ ಸಂಸಾರಾಕ್ ಖಬಾರ್ ಪಾಶಾರ್ ಜಾಲಿ!!

 

ಥೊಡ್ಯಾಂಕ್ ಕುಟ್ಮಾ ಸಯ್ರ್ಯಾಂ ಸಾಂಗಾತಾ ಮಾತ್ಯೆಕ್ ಪಾಯ್ಲಿಂ
ಅನಿ ಥೊಡಿಂ ವೊಳೊಕ್ ಕಳ್ನಾಸ್ತಾಂ ಅನಾಥ್ ಉರ‍್ಲಿಂ
ಹಿಂದು ಮುಸ್ಲಿಮ್ ಕ್ರಿಸ್ತಾಂವಾಂಕ್ ಸಾಂಗಾತಾ ಮರ್ಣಾ ವಿಧಿ ಸಂಪಯ್ಲಿ
ರೆವೆರ್ ವ್ಹಾಳ್‍ಲ್ಲೊ ರಗ್ತಾಚೊ ಘಾಮ್... ಮಾಂಯ್ ಗಾಂವಾಕ್ ಭಿಜಯ್ಲೊ!

 

ಸಗ್ಳಿಂ ಮೆಳೊನ್ ಮಾಗ್ಯಾಂ ಶಾಂತಿ... ದೇವಾ ಬಾಪಾ ಲಾಗಿಂ
ಸಾಸ್ಣಾಚಾ ಸಾಸ್ಣಾಕ್ ವಿಶೆವ್ ದೀಂವ್ಕ್, ಪ್ರಕಾಸ್ ಫಾಂಕಂವ್ಕ್
ತುಜ್ಯಾ ಗೊಪಾಂತ್ ಆರಾವ್ನ್ ದವರ್ ತಾಂಕಾ, ಕುಟ್ಮಾ ಥಾವ್ನ್ ವಿಂಗಡ್ ಜಾಲ್ಲ್ಯಾಂಕ್
ಘಾಲ್ ಬೆಸಾಂವ್, ಪರತ್ ಹೆಂ ಘಡಿತ್ ಘಡಾನಾ ಜಾಂವ್ಚಾಕ್.